بالليل كنت قاعد في البلكونة بتأمل
في الكون الفسيح اللي ملوش نهاية
كالعادة يبدأ عقلي يفكر في حال الدنيا
ازاي أنا كنت عايش في سنوات البداية
كنت طفل صغير معرفش حاجة عن الدنيا
كل أدواتي القلم و الأستيكة و البراية
تمر السنين و بقيت شاب كبير
و تبدأ معايا أغرب حكاية
كل اللي بحلم بيه الصحة و رضا ربنا
و اللي حواليا مبيتعبوش من اذايا
بسامح و بكبر و ببص لقدام
بس علي فين ؟! ماشيين ورايا ورايا
صبرت و استحملت و احتسبت عند ربنا
عشان في يوم من الأيام مش هيبقوا معايا
مرحلة جديدة في حياتي عايش تقريبا لوحدي
وشي مفيهوش نور و غابت عني الضحكاية
عندي أزمة ثقة في الناس و ببعد عنهم
و اللي في قلبي عمره ما يخرج من جوايا
دايما حاسس باليأس و ان مفيش أمل
و باصص للنص الفاضي من الكوباية
لكن بفوق و بقول لا لسة الحكاية منتهتش و في يوم هحس
بطعم الحياة زي السكر في البلحاية
أنا هتوكل علي الله دة كله بايده
و ادعيله يغفرلي الذنوب و الخطايا
دة ربنا الكريم قالنا ندعيله و هو يجيب
و منه وحده النور و السكينة و الهداية
أرجع لعالم الواقع تاني و أنا متفائل
بعد ما طالت و طالت بيا السهراية
و قبل ما انام بقلبي قلت يا رب
و صحيت لقيت جنبي أحلي ورداية
!!!!!!!!
No comments:
Post a Comment