المصري ... مش عظيم و لكن

انت يا "انسان" ياللي هتقرا الكلام اللي جاي دة .. ازيك ؟ .. عامل ايه ؟ .. انشالله يا رب بخير ... جايز تستغرب أنا ليه قولتلك يا "انسان" مش يا "أستاذ" ولا يا "باشمهندس" ولا يا "دكتور" مثلاً ... متستغربش .. هتعرف ليه بس مش دلوقتي

كلامي اللي لا أبتغي من وراه غير الإصلاح ما استطعت هيدور حول شخصية "المصري" .. و مش النادي البورسعيدي لا , قبل ما تئلش يعني
المصري هو مواطن بيعيش في دولة اسمها مصر , بس للأسف هو شايف ان مصر دي أحسن بلد في العالم (مع ان مفيش حاجة بتدل علي كدة) .. جايز يكون خياله فيه حاجات بقية العالم مش شايفها .. الله أعلم .. بس عموماً هو مصمم علي كدة! .. ما علينا

المصري هو مواطن بيعيش في دولة اسمها مصر , بس للأسف برضه موهوم ان تاريخ ال 7000 سنة حضارة دة بيديله فضل علي البلاد التانية (معرفش ليه) بس هو شايف كدة و بيفتخر بكدة جداً كمان! .. و ان مصر محفوظة من كل سوء (لمجرد بس انها ذكرت في القرآن 5 مرات مش عشان أي سبب تاني) .. طب انت يا سيدي طالما تاريخك 7000 سنة حضارة زي ما بتقول , انت ليه محسوب من الدول المتخلفة و في دول تانية عمرها مكملش 1000 سنة و فرق الرقي و الحضارة بينك و بينهم يكاد يكون يقرب من ال 7000 سنة اللي انت بتتكلم عنهم دول! .. شفت بقي .. انت محتاج ل 7000 سنة قد اللي انت فرحان بيهم دول عشان تبقي زي الدول الجميلة دي (دة لو عرفت) ... عالعموم ربنا يوفقك

المصري هو مواطن بيعيش في دولة اسمها مصر , بس للأسف عايش علي كدبة (هو اخترعها و عاشها في خياله لغاية ما صدقها و بقي بيرددها زي البغبغان) بتقول ان "المصري متدين بطبعه" ... بحاول دايماً أدور علي جملة تانية تضحك أكتر من الجملة دي بس مش بلاقي .. ولا استني كدة .. يمكن جملة "المرة دي بجد مش هنسيبها لحد" تنافسها شوية! .... نرجع للكدبة العسولة أوي دي بقي .. هو ازاي المصري متدين بطبعه و انت مثلاً علي موقع تويتر قليل لما تلاقي واحد أكاونته نضيف مفيهوش شتايم ؟؟ .. و انت مثلاً لما تمشي في الشارع تسمع الاهانات و الشتايم من كل حدب و صوب ؟؟ .. و انت مثلاً شايف ان أفلام السبكي و خالد يوسف عليها الإقبال الرهيب اللي بيحصل عليها دة! .. و انت مثلاً بتلاقي الصفوف في المساجد في كل صلاة لو كملت 3 صفوف يبقي خير و بركة .. و انت مثلاً شايف الشباب و البنات بيكلموا بعض ازاي و تصرفاتهم اللي مش هخوض فيها و في تفاصيلها لان كلنا عارفين عاملة ازاي! ..

المصري هو مواطن بيعيش في دولة اسمها مصر , بس للأسف هو نموذج للشخصية المتناقضة! .. تلاقيه بيقولك "لا يا عم أنا مسيبش أختي تكلم فلان و لا تقعد مع فلان" و هو عادي جداً يكلم دي و يخرج مع دي! .. تلاقيه بيقولك "لا يا عم أنا مكدبش" .. عشان بس الموقف هو هيلاقيله حل غير الكدب , انما لو مفيش حل يخرجه من موقف متأزم غير الكدب هيكدب عادي و بحنكة و يقولك "يا عم كدبة بيضة .. و انت كنت عايزني أعمل ايه يعني؟!" .. تلاقيه بيقولك "لا يا عم أنا مبشتمش" .. و هو فعلاً مبيشتمش في البيت عشان أهله و ممكن حتي مع صحابه مبيشتمش برضه (ولو ان الصنف دة قليل) , بس شوف بقي أكاونتاته علي فيس بوك و تويتر مثلاً و انت تلاقي قواميس شتايم من اللي تعرفها و اللي متعرفهاش! .. تلاقيه بيقولك "دة فلان دة زي الفل .. دة حبيبي .. دة آخر احترام" .. و هو بيقول كدة لتحقيق مصلحة مش أكتر , انما هو غالباً بيبقي شايفه عكس كدة تماماً , بس تقول ايه .. الموقف يقتضي النفاق يبقي ينافق مينافقش ليه؟! .. و الحجة طبعاً بتكون "سايس أمورك عشان تمشي في البلد دي" .. ماشي يا حبيبي .. هجيلك في الكلام متقلقش

المصري هو مواطن بيعيش في دولة اسمها مصر , بس للأسف بيشوف الأمور من زاوية واحدة بس (و غالباً بتبقي زاوية غلط) .. خد عندك .. "الزبال" أو "عامل النضافة" أفضل , بيتبصله في البلد العجيبة دي علي انه شخص واطي ملوش لازمة و الناس بتقرف منه و سهل أوي تعرف انطباع المسمي ب "المصري" عن الشخص العظيم دة من طريقة نطقه لكلمة "زبال" .. هو بيبصله علي انه الشخص اللي بيتعامل مع الزبالة فطبعاً لازم نحتقره (علي اعتبار ان الزبالة حاجة حقيرة يعني فاللي يتعامل معاها يبقي حقير زيها) .. طب ماشي .. لو (عمك) الزبال دة اتشال من بلدك دي .. هتعمل ايه يا حلو ؟ .. هتشتغل انت بداله ؟ .. مظنش .. "المصري" مش بيبص للزبال دة علي انه شخص ليه دور كبير و بيقوم بوظيفة كبيرة , و انه لو مش موجود ممكن "المصري" دة نفسه يجيله أمراض بسبب (زبالته) شخصياً ..... و قيس علي كدة بقي مهن تانية زي "السباكة" مثلاً

المصري مواطن بيعيش في دولة اسمها مصر , بس للأسف عنده حالة في مخه بتخليه يتقمص دور بني إسرائيل في مقولتهم الشهيرة انهم "شعب الله المختار" .. دة بيظهر بوضوح في الجملة التاريخية اللي بينفرد بيها "المصري" .. "انت مش عارف انت بتكلم مين" .. أو "انت مش عارف أنا ابن مين" ... طب يا عم المهم .. انت يعني شخصية محصلتش و مسنود و ليك علاقات تخليك في مكانة أعلي من الناس ؟؟!! .. طب ما انت لو عملنا مقارنة بينك و بين ناس أعلي منك هتطلع انت ولا حاجة برضه بالنسبة لهم! .. كل كبير و في اللي أكبر منه زي ما بيقولوا

المصري مواطن بيعيش في دولة اسمها مصر , بس للأسف شايف غيره بس و عايش كأن مفيش في بيته مراية (مراية يشوف فيها نفسه و أخلاقه و تصرفاته) .. دة لو في جايزة لأكتر مواطن بيحكم علي المواطنين أمثاله , ف "المصري" هيفوز بيها بجدارة .. تلاقيه بيقولك "يا عم دة فلان دة يستاهل كذا و كذا" .. "متقوليش اسكت يا عم .. انت مشوفتش هو قال ايه و عمل ايه؟" .. "يا عم دة عاملنا فيها شيخ و بص أصلاً لبسه عامل ازاي و شكله عامل ازاي" (و الشخص اللي بيتكلم عليه دة مبيبقاش فيه حاجة غلط ولا حاجة , بس أهو لازم أي حاجة غلط تطلع فيه و خلاص عشان يبقي في مبرر يحطه لنفسه و هو بيهاجم غيره و يحكم عليه) .. و الله أنا علموني في المدرسة ان اللي خالق البشر و هيحاسبهم هو ربهم (علي حد علمي مكانش ابن آدم هو اللي بيقوم بالمهمة دي) فيا رب ميكونوش كانوا بيعلموني غلط

كفاية كدة ؟ .. كفاية .. (بس خلينا فاكرين ان في "بلاوي" تانية) .. بس ياللا هتقمص دور الأعمي و أغمي عيني عن "البلاوي" التانية دي عشان الصورة متبانش كئيبة أوي و الناس تقول عليا دة ماسك عالواحدة (مع ان دة شئ يشرفني) طالما في الحق

تعبت من القراية ؟ .. معلش .. في ميزان حسناتك ان شاء الله .. ارجع معايا بقي كدة للأول خالص .. أنا لما خاطبتك قولتلك يا "انسان" صح ؟ .. صح برافو عليك .. أيوة هي دي الكلمة اللي فيها حل كل المصايب اللي بيعملها هذا "المصري" سواء بجوارحه أو بخياله المريض! .. الحل ان هذا "المصري" ربنا يكرمه كدة و يتحول ل "انسان" .. ادعي معايا و قول ربنا يكرمه يا رب

المصري دة طالما هو متدين بطبعه , مش المفروض يبقي عارف ان من أساس دينه ان المؤمن لا يكذب ؟؟!! .. لا شكله مش عارف .. او عارف و بيعمل عبيط .. طب طالما هو متدين بطبعه , مش المفروض يبقي عارف ان المنافقين ان شاء الله في الدرك الأسفل من النار ؟؟!! .. لا شكله مش عارف .. أو عارف و بيعمل مش واخد باله .. طب طالما هو متدين بطبعه , مش المفروض يبقي عارف ان الكبر و التكبر علي الناس دة من أخطر أمراض النفس و ان رسوله الحبيب قال "لا يدخل الجنة من كان في قلبه مثقال ذرة من كبر" .. يا عم بيقولك متدين بطبعه .. عايزه يعرف أحاديث رسوله بيقول فيها ايه ؟! .. انت اتجننت ؟؟!! ..

المصري دة طالما بيفتخر بال 7000 سنة حضارة بتوعه , مش المفروض يحافظ بقي علي حضارته المزعومة دي و يشتغل بذمة و يعامل الناس في شغله و في حياته اليومية عامة و في بيته و في غيطه كويس ؟! .. ولا هما ال 7000 سنة حضارة بتوعه دول هيخلوه احدي الدول الصناعية الكبري مثلاً و أنا معرفش ؟؟!! .. جايز

المصري دة طالما هو شايف نفسه عظيم و انه أحسن من أي حد (مصري غيره أو مش مصري أصلاً) , مش المفروض بقي ان ربنا ميخليهوش يتعرض لمواقف يبان فيها انه عادي زيه زي غيره (طالما هو المواطن اللي محصلش بقي و كل حاجة تحت أمره) ؟؟ .. ولا أنا جاي مع العفش و مش فاهم حاجة و لا ايه ؟؟

طبعاً طبعاً طبعاً أي حد فيه الصفات العجيبة القميئة اللي قولتها دي كلها فدة أكيد أبعد ما يكون عن وصف "انسان" بمعناه الأصلي اللي مش ملوث بعادات و تقاليد و موروثات و خصائص غيرت معناه تماماً .. للأسف هذا المصري نسي انه انسان اتولد بعد حمل 9 شهور (سبحان الله زيه زي كل الناس) .. و نسي انه عشان يبقي علي قيد الحياة لازم ياكل و يشرب (سبحان الله زيه زي كل الناس) .. و نسي انه هيتحاسب في يوم القيامة علي أقواله و أفعاله (سبحان الله زيه زي كل الناس) برضه

المصري دة لو مفاقش لنفسه و دور علي حاجة كدة .. ايه ؟ .. كان اسمه ايه ؟ .. أيوة أيوة البتاع اللي اختفي من زمان دة .. أااااااايوة "الضمير" .. و جرب كدة يسمع لصوت ضميره بوضوح و يحاول يقرب المسافات بين قلبه و عقله و بين دينه و دنياه , يبقي لا يلومن الا نفسه علي سوء حال معيشته و تدني أحواله ... (يا رب بس يعمل اللي قولت عليه دة لانه أصلاً مش واخد باله ان حال بلده و مكانها بين غيرها من البلاد متوقف علي تصرفاته هو و غيره من المصريين مع بعض) ... ياللا نقول يا رب

أنا وحش أنا عارف عشان نشرت الغسيل (اللي مش نضيف) علي النت و دلوقتي أنا أُعتبر جاسوس بالنسبة للتليفزيون المصري! .. بس دي كلمة حق و عشان لما ربنا يسألني عملت ايه عشان تصلح من حال بلدك ألاقي ان شالله حاجة زي دي تشفعلي (لعل و عسي) .. و أنا في النهاية "مصري" زيي زي اللي أنا بهدلته في كلامي دة

أنا مش هعمم و أقول ان اللي أنا ذكرته دة ينطبق علي كل المصريين .. لا طبعاً .. هو عدد كبير منهم الا من رحم ربي ينطبق عليه الكلام فعلاً .. بس أنا اتعلمت (الحمد لله) ان التعميم تعتيم .. فانت ياللي صدعت مني أكيد لو شايف (و ضميرك و قلبك مستريحين لنظرتك لنفسك دي) انك مش فيك العيوب اللي قولتها دي , فادعي ربنا انه يثبتك علي الهدي و الحق و الخير و حاول تكون أحسن كمان و تحسّن من غيرك يا ريت (كمشاركة في إعمار الأرض) .. و متقلقش .. ثوابك عند ربنا مش هيضيع ..... أما بقي لو انت الشخص اللي بهدلناه (لا مؤاخذة) دة , فانت لازم بالبلدي كدة (تعمل لنفسك نيو لوك) .. نيو لوك أخلاقياً , و نفسياً , و عملياً , و أهم حاجة دينياً .... خد الخطوة الأولي و قول نويت و استعين بالله و هو لما هيلاقي نيتك صادقة هياخد بايدك و يهديك للطريق اللي يخليك شخص أحسن مما كنت عليه .. هتقولي الانسان ضعيف و المغريات و الصعوبات و الظروف بتخليه يغلط و كتير بيرجع زي ما كان و ساعات أسوأ .. هقولك صح .. عندك حق .. بس نبيك الحبيب (ربنا يشفعه فيك و فينا) قال "ان الله لا يمل حتي تملوا" ... لما تقع قوم .. لما تقع قوم .. لما تقع قوم .. لانك صدقني لو يئست و فضلت واقع مكانك هتلاقي نفسك في مكان مش هيعجبك (خالص) لا في الدنيا ولا في الآخرة

اللهم أصلح حال مصرنا .. اللهم اكتب لمصر أمر رشد و خير .. اللهم وفقنا لما فيه خير مصرنا و وفقنا اللهم لما تحب و ترضي